點解會有呢個決定呢？其實係當年Working Holiday俾我嘅體驗帶嚟嘅。記得嗰一年喺澳洲，空氣清新、生活悠閒，連路人都多啲笑容，讓我見識到一個完全唔同嘅生活方式。呢種自在嘅生活一直都係自己嚮往嘅，所以就令我開始有移民嘅念頭。

當時我諗過完咗Working Holiday後留喺澳洲讀書，再慢慢攞PR，但現實係銀包唔夠厚，只好返香港搵錢，同時邊做邊搵移民嘅途徑。返到香港後，感覺呢個城市愈來愈唔似以前。被同化愈來愈嚴重，愈來愈多「衣食父母」湧入，樓價高企，日日加班，連講廣東話都會俾人屌。呢啲環境同澳洲真係天壤之別，令我移民嘅心愈來愈強。

決心移民後，我就開始著手搞簽証。嗰陣要考英文，又要準備一堆文件，碌晒人情牌幫手寫reference letters，真係頭都爆埋。嗰陣仲要無搵中介（窮咋因為），要自己一手一腳自己搞掂晒。不過，拎到簽証嗰刻真係好有成就感，知道自己已經踏出咗移民之路嘅第一步。攞到簽証後，我就著手試下搵工啦，點知又好好彩比我喺香港就搵到（想知多啲就去睇我另一篇文啦），搵到工後咁我就即刻向公司辭職。啲同事當然八掛問我點解走，我話係移民啦，佢哋仲串我一句：「香港好地地做乜要去做二等公民？」我就只係可以比一個不失尷尬嘅笑容佢地🤡。點知我2019年年初走左之後，到2019年6月，香港發生咗大家都知嘅事，嗰刻我真係好心痛，但同時間又慶幸自己有準備。

件事發生之後，以前啲同事好積極咁搵返我，清一色都會問：「移民澳洲易唔易呀？香港咁樣我好想走呀！」我就心諗：「當年叫你諗，唔理，依家政策收緊晒，先嚟問。」其實自2018年起，移民政策真係越嚟越嚴，合格分數由60分升到65分，仲要唔包生仔，嗰陣你有75分都未必有邀請。所以，移民真係要趁早！

回望當年Working Holiday嗰種自由同美好，真係無悔揀咗移民呢條路。希望我嘅經歷可以俾大家啲啟發，有呢個想法就早啲行動啦，唔好等政策收緊先嚟問。繼續留意我嘅Blog，我會分享更多實際經驗！