「明明話一個月就得㗎…點解而家要成個幾月？如果最後買唔成…咁點算呀？」
第一次喺澳洲買樓，我真係試過急到咁問個 broker。
嗰陣業主已經 accept 咗我個 offer…但銀行個 finance approval 遲遲都未落。眼見個期限就到，我又唔知原來可以傾 extension…真係以為今次可能買唔成。
辛辛苦苦先搵到一間自己鍾意、又負擔得起嘅屋…唔通就咁冇咗？
不過講返轉頭…連我自己都冇諗過，最後會買咗呢一間。
由租一間房開始
2019 年，嗰陣我嚟咗澳洲大概半年，喺 Tasmania 住，租緊一間房。
喺香港我冇買過樓。第一次買樓，就係喺一個好多嘢都未熟嘅地方開始。
點解想買？其實冇乜咩偉大計劃嘅…
都係好傳統嘅諗法囉：想有個自己嘅地方。
嗰陣純粹諗住自己住，冇諗過 investment，更加冇諗過之後會有第二間。就係覺得…如果可以有間屬於自己嘅屋企，應該幾好喎。
開心梗係有，但緊張都有。人生第一次，咁大筆錢…邊有可能完全唔驚㗎。
咁由邊度開始？
上網囉。
Realestate.com.au、Domain…逐個盤咁睇。我自己就用 Realestate.com.au 多啲。一路睇，一路搵資料…買樓要做咩、要搵邊個，好多都係由零開始學。
Budget 話晒事
講揀區，好似可以有好多條件、好多分析咁。但我嗰陣最實際嘅條件得一個：budget。
有啲區幾鍾意㗎…一睇價錢，唔得，超 budget。
咁咪再搵遠啲囉。
越搵越遠…慢慢就去到 Greater Hobart 比較外圍嘅地方。
我有先同 broker 傾過，交咗資料畀佢，了解下大概借到幾多，再跟住個範圍去睇。不過未正式 approve，始終都係大概啫…心入面總係有啲唔踏實。
個 broker 都係上網搵嘅，咁啱佢個 office 就喺我嗰陣公司對面，行過去就到。搵華人 broker，主要都係易溝通啲，唔明可以問清楚。
第一次買樓，唔識嘅嘢多…就係咁一步一步行。
真正入屋 inspection，我記得大概睇咗三、四間，唔算多。因為篩完價錢，真係揀得嘅已經冇幾間。
本來想買嗰間…突然唔賣
最初我其實睇中咗 Claremont 另一間屋。
嗰間平啲，塊地又大啲，broker 仲同我一齊去睇過，佢都覺得可以試下。
我本來係想出 offer 㗎。
點知最後業主話想留返畀自己啲仔女，唔賣喇。
咁咪冇得繼續囉。
至於最後買咗嗰間…反而係我本身冇乜期望嘅一間，仲差啲連睇都冇去睇。
我留錯咗電話，個 agent 搵唔到我，之後再 send email 問我仲去唔去。
我諗…應承咗人就去埋佢啦。人哋都喺度等緊，唔想爽約，唔想做嗰個累人白等嘅人。
就係咁，我去咗。
冇乜期望…反而睇完鍾意咗
嗰間係兩房 villa，我自己一個去睇嘅。
間屋有啲殘舊，但好實用。後面有個 deck，坐喺度望到水景；前面又係一大片草地，好開揚。
睇落去…真係幾舒服。
唔係樣樣都完美，但嗰種感覺係：如果住喺度，應該都幾好喎。
返去之後，我諗咗大概兩日。
究竟繼續睇，定係就揀呢間？
自己係鍾意嘅，但咁大筆錢，又唔係買棵菜，梗係要諗下啦。會唔會再睇多幾間，有個更好嘅選擇呢？
最後都冇諗到咩大道理出嚟。
只係諗咗兩日，個心都仲係覺得：舒服，自己又鍾意…不如試下啦。
之後來來回回還咗幾次價，最後業主 accept 咗我個 offer。
偏偏呢個時候…另一間又搵返我
以為揀定咗喇，點知一兩日之後，同區另一間物業個 agent 又搵我。
呢間我之前 enquire 過，但一直都冇回覆。原來之前另一個買家冇繼續，所以而家問我仲有冇興趣。
我最後都有去睇。
地方幾吸引，塊地又大，真係有諗過出 offer 㗎。
但心入面好唔舒服。
因為另一邊已經 accept 咗我個 offer，我覺得自己都答應咗人…而家又諗第二間，好似過唔到自己嗰關。
最後我坦白同個 agent 講，我其實已經有另一間 accept 咗 offer。
再傾落去先知…原來兩個 agent 係同一間公司嘅同事。
對方知道咗個情況，今次就冇再繼續落去。
後來我間中都會撳返入去睇下嗰間屋。佢而家價錢係高過我嗰間少少，但旁邊又起緊屋…如果當時買咗，住落可能又係另一種體驗。
我冇覺得好失望。
因為你揀嗰一刻…真係唔會知道之後所有嘢㗎。
未有 PR…買唔買好？
仲有一樣嗰陣要諗嘅，就係我未有 PR，仲係攞住工作簽證。
除咗一般買樓啲開支，仲要搞 FIRB，同埋當時 TAS 對海外買家嘅額外稅。
我有諗過…不如等攞咗 PR 先買？
但嗰陣預計仲要等兩、三年。
同朋友、broker 傾過，佢哋提我：如果等嗰幾年樓價升咗，最後可能畀多咗嘅，仲多過而家想慳嗰筆錢。
我自己聽完都覺得有道理。早啲買可以早啲住入自己地方…為咗慳一筆費用再等幾年，我嗰陣覺得未必值。
所以最後決定唔等。
呢個係我自己當時嘅考慮。回望自己後來嘅情況，我覺得呢次決定係值得嘅。但每個人情況唔同㗎。
FIRB 我都係自己上網搞，印象中申請唔算難，批得都幾快。反而最令我緊張嘅…係銀行嗰邊。
業主 accept 咗…都仲未鬆得一口氣
個 offer 有 subject to finance，但銀行一日未批，我都唔敢當真係買得成。
等吖等…本來以為一個月左右搞掂，結果都仲未有 approval。
嗰陣我真係唔知可以要求 extension。
我嘅理解係…期限就到，如果銀行趕唔切、業主又唔肯等，咁係咪就冇咗？
所以先有開頭嗰幾句。
我有同 broker 發過牢騷：講好一個月，而家拖咁耐，如果最後買唔成咁點算？
佢之後安撫返我，話可以試下同業主傾，爭取延長少少時間。
好彩…最後業主肯等。
之後冇幾耐，finance approval 終於落咗。
嗰一刻真係鬆咗一大口氣。
終於得喇。
多謝完個 broker，個心先真正定返落嚟，開始等 settlement。
買樓啲功課…真係一路做一路先識
如果你問我，買之前係咪已經識晒成套程序？
梗係唔係啦。
好多都係上網睇，有時 broker 提下，有時睇到合約某啲條件，先知下一步要搵人處理。
例如驗樓，都係去到處理合約嗰陣，先慢慢知道要安排。
好彩份驗樓報告冇乜大問題，都係啲 handyman 搞得掂嘅嘢，自己亦預咗要整。
反而保險嗰筆錢…我就預得唔夠。
我記得係買樓後期，broker 提我要搞保險，先發現原來仲有呢筆開支。實際係批貸款定交收嗰段時間，我而家已經唔記得喇…但嗰下真係有少少超出預算。
所以講 budget，除咗間屋本身，仲有啲零零碎碎要預埋。每筆未必好大，但加埋就會影響你手上剩返幾多錢。
原來交收唔使我出場
批咗貸款之後，仲有大概一個月先 settlement。
嗰段時間都係等…同埋開始睇傢俬、諗點裝修、搞水電。
我仲要問清楚，交收嗰日究竟要點做。
原來唔使我親身出場㗎。
對第一次買樓嘅我嚟講，呢啲都係新發現。最後就同 agent 傾好幾時攞鎖匙，等通知搞掂。
到真係攞到鎖匙，入到屋周圍行…個感覺好簡單：
終於有自己屋企喇。
呢度係我嘅地方。
之後開始自己整間屋，真係會落心機、落力，因為做緊屬於自己嘅嘢。至於點樣裝修…就留返另一篇慢慢講啦。
住落先更加覺得…呢度幾啱我
買之前我都有喺附近行過，睇過周邊。住咗落去之後，就更加感受到嗰種舒服。
好靜，行幾分鐘有巴士站、有 IGA，臨時買啲嘢好方便。揸幾分鐘車又有商場，出 city 都方便。
前面開揚，後面坐喺 deck 又望到水景。
我嗰陣唔係好熟個區，住落先慢慢覺得…原來呢度幾啱自己。
回望成個過程，真係有啲亂打亂撞。
Budget 有限，選擇唔多；未有 PR，又有額外成本。好多嘢唔識，撞到先搵資料、先問、先處理。
但最後都搞得掂，買到一間自己鍾意、住得舒服嘅屋…對我嚟講已經好值得開心。
有時選擇少…未必一定係壞事。
而有啲當時以為錯過咗嘅嘢，過幾年再望返，亦未必要覺得可惜。
我喺香港未買過樓，嚟到澳洲，都係由租一間房開始。冇一開始就諗好晒之後條路，只係想有個自己嘅地方，然後一步一步咁行。
至於買咗第一間之後，點解諗法慢慢變咗，仲買埋第二間？
嗰個…又係另一個故事喇。
＊呢篇講嘅係我 2019 年喺 Tasmania 嘅個人經歷。簽證、FIRB、稅同貸款安排，要按你買樓嗰陣嘅規定同自己情況再了解清楚。
