第一次自己裝修，有幾傻？

我試過拎住一把油漆掃，慢慢油屋企啲牆。唔係淨係油角落頭，係連大幅牆都用個掃去油。

點解？因為我上網睇片，見人話用 brush 油出嚟個 finish 會靚啲，我就信咗。

返到公司同同事講起，佢哋即刻笑我：

「喂，有冇搞錯？油牆梗係用個碌啦！啲角落頭、細位先用掃㗎嘛！」

我仲好認真咁答：「唔係喎，上網話用掃油得靚啲喎。」

而家諗返都覺得自己傻更更。不過，嗰陣乜都唔識，就係靠上網睇片，然後自己落手試。

就咁開始咗我人生第一次 DIY 裝修。

買完間屋，仲要自己慢慢整

上一篇講到，2019 年，我喺 Tasmania 買咗人生第一間屋。搞掂 settlement、攞到鎖匙之後，下一步就係裝修。

間屋本身有啲舊，牆身係淡黃色，地下鋪住地氈。我想執一執，整成自己鍾意嘅樣，先正式搬入去。

但買完樓，budget 始終有限，所以主要都係自己做。

油牆、拆地氈、鋪新地板，之後買傢俬返嚟砌，全部都係一路學、一路做。

嗰陣日頭要返工，夜晚就揸車去間新屋度開工。做完，再返自己租住嘅地方。

而我就係喺呢段時間，拎住把掃，逐幅牆慢慢油。

真係油咗好耐。

本身放工後可以做嘢嘅時間已經有限，仲要用個掃逐啲逐啲油。做嗰陣覺得自己跟足教學，應該冇錯，點知一講出口就畀人笑。

第一次 DIY 就係咁。睇片嗰陣好似明，落手做先知自己識幾多。

拆地氈，連掉垃圾都要學

除咗油牆，另一樣大工程就係換地板。

我上網搵過唔同地板，最後去咗 Harvey Norman 揀，買咗灰色嘅 hybrid 地板。

不過，鋪新地板之前，要先拆走原本啲地氈。

嗰啲仲要係幾厚重嘅 heavy-duty 地氈，下面另外有一層 underlay。拆出嚟已經一大堆，跟住先發現另一個問題：

咁大堆嘢，掉去邊？

普通垃圾桶根本放唔落。

後來先有同事話我知，原來可以自己揸車，直接車去堆填區掉。

於是，買完人生第一間屋之後，我又多咗另一個第一次：自己去堆填區掉垃圾。

我到而家都記得第一次去見到嘅情景。一堆堆垃圾堆喺度，仲有烏鴉飛嚟飛去，好似平時喺電視或者動畫先會見到嘅畫面。

原來真係咁㗎喎。

都幾震撼。冇諗過自己裝修間屋，連垃圾最後去咗邊，都會見識埋。

有啲錢，最後都係要使

鋪地板又係另一個挑戰。

嗰陣想慳啲錢，我本來諗住用手鋸，自己鋸啲地板。

係，我真係有試過。

但啲 hybrid 地板用手鋸鋸落去，好辛苦。未開始之前諗住，自己慢慢做，應該都得嘅。真正做落去，先發現冇想像中咁簡單。

最後頂唔順，都係去買機。

本來想慳返買工具嗰筆，結果試過先知，有啲錢真係要使。

不過，鋸得掂都只係其中一步，之後仲要自己慢慢砌、慢慢鋪。

除咗廚房同廁所，其餘地方嘅地板，我都自己鋪晒。前後搞咗個幾至兩個禮拜，真係鋪咗好耐。

好彩最後都順利完成，個效果我自己幾滿意。

第一次做，做到咁，已經覺得好有 achievement。

做到一半，已經覺得值得

我揀咗灰色地板，再將原本淡黃色嘅牆油成白色。

慢慢做落去，間屋個感覺開始唔同。

白牆配灰地板，望落乾淨咗，亦越嚟越接近自己想要嘅樣。

其實唔使等全部完工，做到一半，已經開始覺得值得。

因為眼前個轉變，係自己一手一腳做出嚟。每日放工過去整少少，可能進度唔快，但見住啲牆油好、地下逐塊鋪好，間屋慢慢有起色。

之後再自己買傢俬返嚟，逐件砌，試下啲顏色點襯、擺埋一齊好唔好睇。

由牆身、地板，到傢俬，一樣一樣加落去，慢慢就砌出咗自己想住嘅地方。

攞鎖匙，同真正覺得係自己屋企，原來係兩回事

等啲裝修做完，我先正式搬入去。

攞鎖匙嗰日，梗係開心。終於有一間屬於自己嘅屋。

但嗰陣入到去，間屋始終仲係上一手留低落嚟嘅樣。啲牆、啲地氈，都係人哋原本揀好，我接手咗。

到自己親手油過牆、鋪過地板，再將自己揀、自己砌嘅傢俬擺入去，個感覺真係完全唔同。

望住間屋，會記得呢幅牆係自己慢慢油，腳下啲地板係自己逐塊鋪，連件傢俬都係自己砌出嚟。

嗰陣先更加實在咁感受到：

原來呢個真係我嘅地方。

對第一次做嘅我嚟講，由乜都唔識，到最後整成自己鍾意嘅樣，已經好有成功感。

雖然中間傻更更咁用個掃油牆、鋸地板鋸到頂唔順，仲畀同事笑咗一輪，但住入去之後，望返自己做過嘅嘢，真係覺得值得。

尤其係腳下啲地板。

畢竟我真係用手鋸鋸過㗎。